Skýrsla um starfsemi Prófanefndar tónlistarskóla frá
október 2002 til loka september 2003
Tildrög að stofnun Prófanefndar tónlistarskóla
Undirbúning stofnunar Prófanefndar tónlistarskóla má
rekja allt aftur til ársins 2000 en það ár tók til starfa
nefnd með þátttöku fulltrúa Samtaka tónlistarskólastjóra,
Félags tónlistarskólakennara, Félags íslenskra hljómlistarmanna,
Sambands íslenskra sveitarfélaga og menntamálaráðuneytisins.
Nefndin hafði það hlutverk að finna farveg fyrir nýtt prófakerfi
í tónlistarskólum sem uppfyllti kröfur aðalnámskrár tónlistarskóla.
Í samræmi við niðurstöður nefndarinnar var Prófanefnd
tónlistarskóla stofnuð 27. febrúar 2002. Fjörutíu og sjö
tónlistarskólar eru stofnaðilar nefndarinnar.
Hlutverk Prófanefndar tónlistarskóla er að annast samræmt
og hlutlaust mat á áfangaprófum í tónlistarskólum samkvæmt
þeim kröfum sem gerðar eru í aðalnámskrá tónlistarskóla.
Megintilgangur samræmds prófakerfis að tryggja sem kostur
er að sambærileg þekking og færni búi að baki prófi, án
tillits til þess hvaða skóla, kennara eða prófdómara um
er að ræða. Reglur námskrárinnar miða einnig að því að
treysta hlutverk prófdómara í prófdæmingunni.
Nánar tiltekið eru verkefni Prófanefndar eftirfarandi:
- uppsetning prófdómarakerfis í samræmi við ákvæði
aðalnámskrár og fyrirliggjandi hugmyndir,
- frágangur reglna/viðmiðana fyrir prófdómara um prófdæminguna,
- hönnun vitnisburðarblaða/áfangaprófsskírteina,
- þjálfun prófdómara, símenntun og handleiðsla,
- stjórnun og daglegur rekstur prófdómarakerfis,
- ráðning prófdómara,
- skipulag áfangaprófa,
- afgreiðsla kvartana og úrskurðir um kærur vegna áfangaprófa,
- varðveisla gagna um niðurstöður prófa,
- varðveisla gagna um skipulag prófdæmingar,
- skýrslugerð um niðurstöður áfangaprófa,
- upplýsingamiðlun til tónlistarskóla og kennara um prófdómarakerfið
Skipan Prófanefndar
Samkvæmt skipulagsskrá tilnefna Samband íslenskra
sveitarfélaga og Samtök tónlistarskólastjóra hvor sinn
fulltrúa í Prófanefndina. Þá tilnefna Félag tónlistarskólakennara
og Félag íslenskra hljómlistarmanna sameiginlega einn
nefndarmann. Loks kýs fulltrúaráð Prófanefndar tvo
nefndarmenn. Varamenn skulu skipaðir með sama hætti. Prófanefnd
velur formann og varaformann úr sínum hópi. Kjörtímabil
nefndarinnar er fjögur ár.
Í Prófanefnd tónlistarskóla eiga nú sæti:
- Kristín Stefánsdóttir, formaður, fulltrúi FT og FÍH
- Robert Faulkner, varaformaður, fulltrúi STS
- Gunnar Rafn Sigurbjörnsson, fulltrúi Sambands íslenskra
sveitarfélaga
- Hafsteinn Guðmundsson, kosinn á stofnfundi
- Sólveig Anna Jónsdóttir, kosin á stofnfundi.
Varamenn eru:
- Bragi Michaelsson, fulltrúi Sambands íslenskra
sveitarfélaga
- Helgi Þ. Svavarsson, fulltrúi STS
- Sigurður Flosason, fulltrúi FT og FÍH
- Árni Harðarson, kosinn á stofnfundi
- Hildigunnur Halldórsdóttir, kosin á stofnfundi.
Starfsemi nefndarinnar
Frá því að fyrsti fulltrúaráðsfundur Prófanefndar
var haldinn í Hrafnagili í októberbyrjun á síðasta ári
hefur nefndin haldið áfram undirbúningi að fyrstu áfangaprófum
í tónlistarskólum. Það verklag var valið að skipta
verkum milli nefndarmanna og nýta netið til samskipta. Formaður
og varaformaður hafa átt nokkra vinnufundi og símafundi,
auk vinnufunda einstakra nefndarmanna. Einn tveggja daga
fundur var auk þess haldinn með aðal- og varamönnum í Prófanefnd.
Prófanefnd er ljóst að það er ekki einfalt að tryggja
samræmt og hlutlaust mat á áfangaprófum í hljóðfæraleik
en rannsóknir hafa sýnt að með því að prófdómarar
hafi skýr viðmið og séu þjálfaðir í notkun þeirra
þá eykst áreiðanleiki matsins. Þetta er því sú leið
sem nefndin hefur ákveðið að fara og hafa meginviðfangsefni
á tímabilinu verið gerð handbókar fyrir prófdómara og
viðmiðanir fyrir einkunnagjöf á grunn- og miðprófi í
hljóðfæraleik og söng. Þá er hafinn undirbúningur að
fyrsta námskeiði fyrir væntanlega prófdómara.
Það var ætlun Prófanefndar að fyrstu áfangapróf á
vegum nefndarinnar yrðu haldin vorið 2004 og var þá reiknað
með öllum áfangaprófunum, þ.e. grunnprófi, miðprófi og
framhaldsprófi í hljóðfæraleik. Nú er ljóst að þessi
áform voru ekki að öllu leyti raunhæf. Nefndin hefur því
ákveðið að stefna að fyrstu grunn- og miðprófum í hljóðfæraleik
í vor, þ.e. á tímabilinu mars - maí 2004, en framhaldspróf
bíði til næsta skólaárs.
Ákveðið hefur verið að halda námskeið í prófdæmingu
í hljóðfæraleik og einsöng á grunn- og miðprófi fyrstu
helgina í febrúar 2004. Aðalleiðbeinandi á námskeiðinu
verður Philip Jenkins, píanóleikari og prófessor við
Royal Scottish Academy of Music. Hámarksfjöldi þátttakenda
er 35 og verða þátttakendur valdir með tilliti til þarfa
Prófanefndar um fjölda prófdómara í einstökum hljóðfæraflokkum,
en eins og kunnugt er miðar aðalnámskrá tónlistarskóla
við að prófdómarar á grunnprófi geti dæmt próf á hvaða
hljóðfæri sem er en á miðprófi dæmi prófdómari
einungis próf í sínum hljóðfæraflokki. Prófanefnd hefur
gengið frá auglýsingu um námskeiðið sem liggur hér
frammi og mun m.a. verða dreift í alla tónlistarskóla. Í
kjölfar námskeiðsins verða prófdómarar ráðnir til
starfa en þátttaka í námskeiðinu er ekki trygging fyrir ráðningu.
Mikilvægt er að hæfir prófdómarar fáist og mun Prófanefnd
kappkosta að svo verði.
Að undanförnu hefur verið unnið að heimasíðu fyrir
Prófanefnd og mun hún verða opnuð á næstu dögum.
Veffangið verður: www.profanefnd.is og mun tilkynning um
opnun síðunnar verða send í tónlistarskóla. Enda þótt
síðan sé enn ekki komin á netið er ekkert því til
fyrirstöðu að kynna uppbyggingu hennar hér. Vonandi mun
heimasíðan reynast gagnleg og þiggur nefndin með þökkum
ábendingar um efni á síðuna.
Sérstaklega vil ég vekja athygli á drögum að viðmiðunum
fyrir einkunnagjöf á grunn- og miðprófi sem komið hefur
verið fyrir á heimasíðunni. Óskar Prófanefnd eftir ábendingum
varðandi þessar viðmiðanir fyrir miðjan nóvember næstkomandi.
Formanni og varaformanni Prófanefndar gafst kostur á að
kynna störf nefndarinnar á svæðisþingum tónlistarskóla,
annars vegar á Selfossi þar sem saman komu tónlistarkennarar
úr nágrannasveitarfélögum Reykjavíkur, af Reykjanesi, úr
Vestmannaeyjum og Suðurlandi, og hins vegar hér í
Borgarnesi um síðustu helgi þar sem tónlistarkennarar af
Vesturlandi og Vestfjörðum hittust. Tókust þessar
kynningar vel og sýndu þátttakendur viðfangsefnum Prófanefndar
áhuga.
Fjármál
Reikningsár Prófanefndar tónlistarskóla er frá 1. ágúst
til 31. júlí. Á síðasta fulltrúaráðsfundi var samþykkt
árstillag að upphæð 100 krónur á hvern nemanda í
reglulegu námi, skv. ákvæðum skipulagskrár. Þá ber aðildarskólum
að greiða stofnframlag, 15.000 kr. vegna tónlistarskóla með
færri en 200 nemendur og 30.000 kr. vegna skóla með 200
nemendur eða fleiri. Prófanefnd hefur enn ekki innheimt þessi
gjöld enda þótt greiða ætti þau fyrir 15. nóvember á síðasta
ári. En nú er ljóst að gera verður bragarbót því ekki
er lengur hægt að komast hjá útgjöldum vegna Prófanefndar.
Ekki verða lagðir fram endurskoðaðir reikningar að þessu
sinni heldur einungis yfirlit um ógreiddan kostnað vegna
nefndarinnar.
Viðræður við menntamálaráðuneytið hafa átt sér
stað um fjárstuðning til nefndarinnar og nýverið var sótt
um þróunarstyrk að fjárhæð 500.000 kr. en svar hefur enn
ekki borist. Þá er gert ráð fyrir að ráðuneytið styrki
prófdómaranámskeið eins og áður hefur verið lofað og
verður fjárstyrkur væntanlega hækkaður eitthvað frá því
sem ákveðið hafði verið. Síðast en ekki er gert ráð
fyrir að Prófanefnd tónlistarskóla og menntamálaráðuneytið
geri með sér samstarfssamning og mun væntanlega verða
gengið frá honum í kjölfar afgreiðslu umsókna um þróunarstyrkinn
og fjárstuðning vegna prófdómaranámskeiðsins.
Verkefni framundan
Ljóst er að mikið starf er framundan hjá Prófanefnd tónlistarskóla
á næstu mánuðum. Ganga þarf frá viðmiðunum fyrir
einkunnagjöf, handbók fyrir prófdómara, halda prófdómaranámskeiðið,
ráða prófdómara, endurskoða áætlanir um kostnað vegna
áfangaprófanna, ljúka gerð vitnisburðar- og einkunnablaða,
skipuleggja framkvæmd prófanna og varðveislu niðurstaðna
prófanna, svo það helsta sé nefnt. Síðast en ekki síst
þarf að kynna þetta nýja prófakerfi fyrir væntanlegum
notendum.
Lokaorð
Það er von Prófanefndar tónlistarskóla að okkur
takist það vandasama verk að koma á fót prófakerfi fyrir
tónlistarskólana sem standi undir væntingum og í því
efni er samstarf við fulltrúaráðið mikilvægt á næstu
árum. Vonandi hefur okkur miðað áleiðis í rétta átt þegar
við hittumst að ári. Ég vil að lokum þakka samstarfsmönnum
í Prófanefndinni, bæði aðal- og varamönnum einkar gott
samstarf á þessu starfstímabili.
Reykjavík, 3. október 2003
Kristín Stefánsdóttir, formaður
|
