Hlutverk Prófanefndar tónlistarskóla er að annast samræmt og hlutlaust mat á áfangaprófum í tónlistarskólum í samræmi við þær kröfur sem gerðar eru í aðalnámskrá tónlistarskóla
Skráning í próf LeiðbeiningarÁfangapróf eru skipulögð í samvinnu við viðkomandi tónlistarskóla. Próf geta farið fram hvenær skólaárs sem er að því tilskildu að hæfur prófdómari fáist til starfa. Leitast er við að verða við beiðnum skóla um prófdaga, eftir því sem frekast er kostur, en þar sem lögð er áhersla á það við skipulagningu áfangaprófa að nýta starfskrafta prófdómara sem best, verður stundum að tengja saman próf í fleiri en einum skóla ef um mjög fá próf er að ræða. Þó er miðað við að nemendur þreyti áfangapróf í sínum skólum nema samkomulag verði um annað.
Að neðan má nálgast yfirlit um prófþætti í áfangaprófum í einstökum greinum, bæði í klassískri tónlist og í rytmískri tónlist. Þar er m.a. að finna dæmi um prófverkefni, valin úr þekktum tón- eða söngbókmenntum. Einnig eru þar sérstakar upplýsingar um prófkröfur í óundirbúnum nótnalestri á grunn- og miðprófum í klassískri tónlist (þó ekki ásláttarhljóðfæri, harpa, orgel og harmonika).
Prófþættir í klassískri tónlist
Prófþættir í rytmískri tónlist
Nánari upplýsingar um verkefni og prófkröfur á áfangaprófum er að finna í almennum hluta aðalnámskrár tónlistarskóla og viðkomandi greinanámskrám.
Samkvæmt aðalnámskrá tónlistarskóla bera kennarar ábyrgð á því að prófverkefni nemenda séu í samræmi við kröfur námskrár. Prófanefnd fer ekki yfir þau prófverkefni sem tilgreind eru á prófbeiðnum nema þess sé sérstaklega óskað.
Samræmt miðpróf í tónfræðagreinum vorið 2025 verður haldið þriðjudaginn 25. mars 2025 og fimmtudaginn 27. mars 2025. Tilkynna þarf um nöfn próftaka til Prófanefndar eigi síðar en mánudaginn 3. mars 2025 á þar til gerðu eyðublaði sem er að finna hér.
Eins og mælt er fyrir um í Aðalnámskrá tónlistarskóla: Tónfræðagreinar (2005) verður prófið þrískipt, þ.e. munnlegt tónheyrnarpróf (20%), skriflegt próf (60%) og valverkefni (20%). Fjallað er nánar um hvern þessara prófþátta hér á vefnum, próf- og matsaðferðum lýst eins vel og kostur er, auk þess sem birt er sýniseintak af skriflega prófinu ásamt tóndæmum og fyrirmælum.
Tónlistarskólar greiða Prófanefnd prófgjald vegna hvers áfangaprófs. Þó er sérstakt gjald innheimt vegna tónleika á framhaldsprófi.
Prófgjöld haustið 2024 eru sem hér segir:
Prófgjaldið er jafnhá fjárhæð vegna allra tónlistarskóla. Prófanefnd greiðir allan kostnað vegna prófdómara, þar á meðal ferðakostnað þegar við á.
Samkvæmt samþykkt fulltrúaráðsfundar Prófanefndar skal almennt innheimta prófgjald vegna áfangaprófa sem hætt er við með minna en 14 daga fyrirvara. Einnig hefur fulltrúaráð Prófanefndar ákveðið að tónlistarskólar, sem óska eftir prófdómara til að meta stök grunn- eða miðpróf, án þess að fallast á tilmæli Prófanefndar um að tengja þau öðrum prófum, skuli greiða þann umframkostnað sem til fellur.